Dei Ha Phi Ki Samla Ka Jaidbynriew Ka Shaniah, Ym Ha Ki Lei San Snem

Daka jingsngewkhia ka mynsiem, ym banse khlem da kynthoh iaka jinglong jingman ka jong ngi hakaba ia ki para doh para snam lah shah ieh marwei ynda poi haka kam iap ka kam im ka jaidbynriew hynñiewtrep baroh kawei. La kadei haka kam imlang sahlang ka bha ka miat ruh, ngi iohi ba ngi im daka mynsiem bishni bad pihuiñ iaka jingmut ba bha jong kiwei (ki para doh para snam, para khasi), ngim shym la lah ban pdiang dakawei ka sur kawei ka jingmut bad ngim shym la don kata ka jingiatylli para ma ngi. Ka jingkylli kaba mih ka long BALEI NGIM LAH BAN IALONG KAWEI?

Kum u riew paitbah kaei kaba hylla shabar, iakata ngi shait ioh sngew. Haka juh ka por, hakine ki sngi, la iohsngew ba la don ka jingsawa jam kaba baroh baroh ngi la kyllut bad matlah khlem da tip bha kaei kadaw kaba ngi kyllut bad matlah. Kane ka jingsawa ka pynmih daka jingtem drum (petrol bomb) jong ki khun kari (KSU) hakaba ki mynder kida shad lamwir shane shatai daka jingsyier mynsiem bad kadaw jong ka jingsawa kalong ba ki pari ki kmen bad pdiang burom iakane jingwan jong ka radbah badei ka kmie ka kit ka bah (rel). Bad shi bynta kum ka jinglehkmen iakane ka jingwan ka kmie Rel, la sakhi ba dei tang ka KSU kaba kmen bad kaba ieid kmie tam napdeng kiwei pat ki khun. Phewse lada tang marwei ka khun ba leh kmen tem Drum, hato kan long iaka kmie ban kmen? Balei kiwei kiwei kim tem daka Guitar/Sitar, Duitara, Bisli, Harmony bad kiwei kiwei?

Kum ka Sur u Paitbah, ym banse hap kyrwoh shi kyrwoh iaka mynsiem iatylli ban long ki kam ki jam kiba jop. Hooid, iaka jinglong briew hi ym don kiba biang lut nadong shadong hynrei haka jingmut lade, nga kwah ban ong ba, Balei ngim khapbrip shisien shisien iakita baroh ka jingbakla ki tam ki duna bad ngin pynkhie im biang iakaei kaba donkam naka bynta ka bri u hynñiewskum.

Kyntang iawai, ngi tip iaka kyntien ba ong, TYLLI NGIN IENG, SAPRET NGIN KYLLON. Nga hangne ym ba nga iaroh eh iaka KSU shibynta hynrei nga pynpaw iaka jingsngew jong nga ba donkam ka jingiatylli.