Sha kiwei ki jylla, ki sorkar bapher bapher ki la bun kam ban thaw bad ban wad bun ki lad ki lynti ban pynkhie im biang ïa ka kamai kajih jong ki nongbylla kaba la ktah jur ha kine ki sngi ba la dep na ka daw jong u Covid-19. Hynrei phewse ka jylla Meghalaya ka la bun kam kylla ban thaw ki lad ki lynti ban kjit bad ban pyntyrkhong ïa la ka pla ki nongshong shnong naduh ka khaïi ka pateng, ka ïaid ka ïeng bad haduh ka koit ka khiah ruh kumjuh. Kaba ithamula bha ka long wat ïa ki samla wad kam wad jam ruh kaba ha ka jingmut ki dei ki nongwadkam bad ki nongai kam ki dei ban siew lada ki ai kam. Ñiuma, ha ka jylla Meghalaya pat, lada wad kam, ka mut ba ki nongwad kam ki hap siew ïa ki nongai kam shuwa ban pdiang ïa ki nongwadkam. Kane ka pynpyrkhat ïa u duk u suk, hato la u kotbor ne em ban siew ïa ka dor ba la buh khamtam eh ïa ki nongbylla ba trei mynsngi bad bam mynmiet.
Kane ka long halor ka khubor laitkam jong ka MPSC,kaba ha nga marwei ngam lah peiphang ban sngewthuh ba haduh katno ka jylla Meghalaya jong ngi ka riewspah eh tad haduh ba ki nong wad kam kin hap siew da ki spah ki spah tang na bynta kawei kabai aplikeshon phom. Bad lada ki nongthep kam ki thep bun tylli k ikam, khem pep kan ktah ïa ka pla bai bam ki duk ki suk bad ka pynbor ïa ki ban wad wat da ka ram. Ka jingrem ka bai phom ka long ruh kum ki diengpynkiang ba khanglad ïa ka jingthmu jong ki. Hooid, lehse lyng ba ka jingsiew bai aplikeshon phom jong ki nongwad kam kan pynlong ïa ki ban kham kheiñkor bad ñiewkor ïa kaei kaba ki la pynlut bad kan pynlong ïa ki ban trei shitom bad ïa khun tyngeh ban pynurlong ïa la ka jingthmu. Hynrei lada puson sani,ka jingbuh dor rem ïa ki bai aplikeshon ha kum kane ka por hiran kam ka long pynban kum ka jingtuh ba jar jar na ki nongshong shnong khamtam ka jylla ba jyllei da ka jingkyrduk kam. Bad ruh ka pynïoh phang ïa ngi ban kren bad ban tharai sniew ïa ki kam sha lyndet jong kane.
Kum ka nuksa, lada ngi shim ïa ka jingkhein rit ba ki samla ba kyrduh bad kiba wad kam, ki la kot da ki lak phew ngut tang na bynta iwei ne artylli ki kam bad lada shispah tyngka marwei na bynta kawei ka kam, ka ïohlum baiphom ka ophis ka kot sha ki klur. Kane ka puson ha ka tyndongshkor jong ngi, ba sha pla jongno kan poi katei ka pisa?Hato ka pla jong ka MPSC ka long kaba pei khamtam lada peit ïa ka rukom pyllut ka MPSC ha ki eksam kam bapher bapher,ngam shym la ïohi ba kan don jingpher ei ei kum ha kaba buh ïa ki CCTV camera la ha interview ne ha ka por ba thoh eksam, ne kin kino kiba kham ïahap katkum ka jingïoh.
Wat la katta ruh, kaba nyngkong hi kum ki nongwad kam ki kwah ban kylli shibun bah ki jingkylli kum, balei ka jylla ka la shim rem ïa ka bai aplikeshon phom? Hato ka jylla Meghalaya ka dei ka jyllaki heh sai pan? Ne hato ka dei ka jingthmu barieh ki katno katne khnang ban khanglad ïa ki duk ki lanot ban thep kam? Kumba ngi tip ba ka jylla Meghalaya ka dei ka Schedule area kaba mut ba bun ki Scheduled Tribe, bad kaba mut ruh ba ka ïoh ka kot jong ki ST ka dang duna bha bad kumno ka sorkar ka pynkylla riewspah jubor ïa ngi baroh. Shuh shuh lada shim ïa ka jingïanujor haba ki public sector jong ka sorkar kmie,na ka bynta kiST bad ban pynshlur ïa ki ban thep kam ka sorkar kmie kam ju shim pisa wat shi tyngka ruh na ki, phewse ha jylla Meghalaya ka long da khongpong.
Shuh shuh kum ban lushia ïa ka ophis MPSC ba ka rukom treikam jong ka, ka pynduh mynsiem ïa shibun ki samla wad kam. Hooid, ngim dei than ban khmih lynti na kata ka kam sorkar bad ngi dei ban nang ban ïeng ha la ki jong ki kjat, hynrei ka jingduna ki lad, ym banse ngi hap ban phai sha kum kine ki ophis sorkar kiba ka kam jong ki ka long ban khmih bniah ïa ka jingduna bad ban pyndap ïa ki jaka ba suda. Bad ka jingbym lah jong kane ka ophis ban khot aplikeshon, ka ktah ïa ka lawei ki samla jong ka jylla. Ka jingdkhoh bad jingslem ha ka rukom pynïaid pynlong eksam, ka pynduh jingshaniah bad shah tharai sniew ha ka rukom thung kam. Ha teng ha teng, ka jingslem ban pyndap ïa ki kam bathylli ka pyndkhoh ruh ïa ka rukom treikam. Ka jingslem ban pynlong eksam kam ruh ka ktah ïa ka lawei ba phyrnai ki khun samla wad kam bad bunsien kat ban pynlong eksam,ki samla ki la klet la ki thep ne em bad ka pyntharai ïa ka rukom treikam kane ka ophis.Shuh shuh jingbym lah ban khot aplikeshon ba man u snem, ka pynkhang lad ïa shibun ngut kiba la noh karta naba ym ïahap shuh bad ka kyrdan rta. Kane ka dei kawei kaba pynduh mynsiem ïa shibun ki samla.
Ka jingkjit na la ki nongshong shnong kan ym wanrah ïa ka bit ka biang hapoh ka jylla. Ban wanrah ïa ka jingkylla, ïa ka sur jong ki paidbah dei ban sngap.
No comments:
Post a Comment