TYNGKAI IA KA UM

On account of World Water Day...

Tok, tok, tok, tok.....

Pha jaw na krem ka mei mariang,

Ba pynlong thwei ha jrong mawsiang.

Pha tuid suki da jingpalei mynsiem,

Ha ki rai-eh rai-dam khlem jingartatien.

Na i jiar iba rit, sha ka tyllong,

Suki suki duriaw pha pynlong.

I tngen mynsiem pha iaid lynti

Ban pyndap pynbiang i'u bynriew ba pli 

Phewse, u bynriew u duh thiah ringsdot,

Ha ka kwah rhah bad ka kwah lalot

Ia pha ula sdang ban leh mutlop.

Kok khai, ki kam pynjot u la jop.

Pha sngur mynsiem kumba ju long,

Watla ia pha, u la iai pynmong.

Pha iai bteng ban pyndap pynbiang,

Khlem ka mynsiem pihuiñ, khlem leh shiliang.

Jingim halor jong pha, ki im kordit

Namar ia ki, u la pynsyng-it.

Ki bih bunjait, u la pynjakhlia

Phewse, ka jingleh hi ka kyrtoh kylla.

Jingpang bun jait, ki la khyllie,

U la kyndit kynsan bad sdang babe.

Kumta ia pha, ngin ym lehkai

Namar jong pha, ngin iai tyngkai.

Haba thynrang ia pha ngi kwah,

Ia jingsliang, ia ngi pha pynjah.

Jingkordor jong pha, ngim lah oh dor,

Naduh nongkyndong, shaduh nongsor.

Nalor ban dih, sa ka shet ka tiew,

Jingkyrpang jong pha, ngim lah ban siew.

Kyrteng jong pha, ngin iai byrsiew,

Na iing shaduh dymmiew.

Jingmyntoi bunjait, ia ngi pha ai

Shi lynter ia pha, ngin iai tyngkai.

Mrad ki mreng, ki dieng pha pynkynsai

Jingthaw ki kmen, kyrhai ki phyrnai.

Kordit ia uba leh pathar

Kunai ia ka um, ha iing ne shabar

Um ksiar-um rupa, ka nam pha ioh

Ia kyrteng jong pha, junom ngin iaroh

Shi tyllup pyrthei, ngin rakhe sngewbha

"Tyngkai ia ka Um", ngin iai pyrta.

Haba ym donkam, ngin pynduna

Ia jaboh, da teknoloji ngin pynkhuid kylla.

Kyntang ia wai, ka poitri ngan thoh

Iwei iwei, ngin sdang ia snoh

Ia ka um, ngin iai kunai

Ia shi jaw ruh, ngin ia tyngkai.